THINGS TO CHECK BEFORE BUYING FLAT
సిటీలో మంచి ఫ్లాట్ కొనాలా? కచ్చితంగా చెక్ చేయాల్సిన అంశాలు ఇవే!
అపార్ట్మెంట్/ ఫ్లాట్ కొనాలని అనుకుంటున్నారా? ఈ 9 విషయాలను కచ్చితంగా తెలుసుకోండి!
Things To Check Before Buying Flat : మీరు సిటీలో మంచి ఫ్లాట్ లేదా అపార్ట్మెంట్ కొనాలని అనుకుంటున్నారా? భవిష్యత్‌లో ఎలాంటి న్యాయపరమైన చిక్కులు రాకూడదా? అయితే ఇది మీ కోసమే. ఫ్లాట్/ అపార్ట్మెంట్ కొనేటప్పుడు కచ్చితంగా చెక్ చేయాల్సిన అంశాలు గురించి ఇప్పుడు తెలుసుకుందాం.
బిల్ట్-అప్ ఏరియా :
మనం ఫ్లాట్ లేదా అపార్ట్మెంట్ కొనుగోలు చేసినప్పుడు బిల్డ్-అప్ ఏరియా గురించి కచ్చితంగా తెలుసుకోవాలి. ఆస్తికి సంబంధించిన బిల్డ్-అప్ ఏరియాలోనే ఇంటి కార్పెట్ ఏరియా, గోడలు, బాల్కనీ, కామన్ ఏరియాలు ఉంటాయి. సాధారణంగా కార్పెట్ ఏరియా కంటే ఈ బిల్డ్-అప్ ఏరియా 15-25 శాతం ఎక్కువగా ఉంటుంది. కనుక ఈ బిల్డ్-అప్ ఏరియాను బట్టే మనం బిల్డర్లకు డబ్బులు చెల్లించాలి.
కార్పెట్ ఏరియా :
కార్పెట్ ఏరియా అంటే ఆస్తికి సంబంధించిన వాస్తవ వినియోగ ప్రాంతం. అంటే గోడల మందాన్ని మినహాయించి, ఇంటిలో నివసించేవారి అవసరాలకు ఉపయోగపడే ప్రాంతం. అందుకే ఆస్తి విలువను ఆ కార్పెట్ ఏరియా ఆధారంగా నిర్ణయిస్తారు. కనుక దీని గురించి బిల్డర్ను ముందుగానే అడిగి తెలుసుకోవాలి. ఇక్కడ కచ్చితంగా గుర్తించుకోవాల్సిన విషయం ఏమిటంటే- టెర్రస్, బాల్కనీ, యుటిలిటీ ఏరియాలు లాంటి ప్రాంతాలు కార్పెట్ ఏరియా కిందకు రావు.
సేల్ డీడ్ :
మీరు ఇంటిని కొనుగోలు చేసేటప్పుడు కచ్చితంగా సబ్-రిజిస్ట్రార్ ఆఫీస్లో ఆస్తిని రిజిస్ట్రేషన్ చేయించుకోవాలి. ఎందుకంటే చట్టబద్ధమైన సేల్ డీడ్ లేకుండా ఏ రియల్ ఎస్టేట్ లావాదేవీ చెల్లుబాటు కాదు.
స్టాంప్ డ్యూటీ :
ఆస్తి అమ్మకం, కొనుగోలు, బదిలీలు చేసేటప్పుడు కచ్చితంగా స్టాంప్ డ్యూటీ చెల్లించాలి. ఆస్తి విలువను బట్టి ఈ స్టాంప్ డ్యూటీ మారుతూ ఉంటుంది. సాధారణంగా ఆస్తి విలువలో 3-8% వరకు ఈ స్టాంప్ డ్యూటీ ఉంటుంది. పురుషుల కంటే స్త్రీల పేరు మీద చేసే రిజిస్ట్రేషన్లకు స్టాంప్ డ్యూటీ తక్కువగా ఉంటుంది. అందువల్ల, మహిళా కుటుంబ సభ్యుల పేరు మీద ఆస్తిని రిజిస్టర్ చేయిస్తే, చాలా వరకు డబ్బులు ఆదా అయ్యే అవకాశం ఉంటుంది.
క్లోజింగ్ ఛార్జెస్ :
చాలా మందికి క్లోజింగ్ ఛార్జెస్ గురించి అవగాహన ఉండదు. బ్యాంకులు, బీమా సంస్థలు, న్యాయవాదులు, స్థిరాస్తి ఏజెంట్లు, పన్ను విధించే వర్గాలు, ఇంటి యజమానుల అసోసియేషన్లు స్థిరాస్తి కొనుగోలుదారుల నుంచి కొన్ని రకాల రుసుములను వసూలు చేస్తుంటారు/ చేస్తుంటాయి. అందుకే వీటిని క్లోజింగ్ ఛార్జీలు లేదా క్లోజింగ్ కాస్ట్లు అని అంటారు.
ఓసీ :
బిల్డర్లు కట్టిన బిల్డింగ్/ అపార్ట్మెంట్/ ఫ్లాట్లను స్థానిక అధికారులు పరిశీలిస్తారు. తరువాత ప్లాన్ ప్రకారం, నిబంధనలను అనుసరించి నిర్మాణం జరిగిందని తెలుపుతూ సర్టిఫికెట్ జారీ చేస్తారు. దీనిని బిల్డర్ ఇంటి కొనుగోలుదారులకు అందజేస్తాడు. ఇదే 'ఆక్టుపెన్సీ సర్టిఫికెట్' (ఓసీ). సదరు అపార్ట్మెంట్/ ఫ్లాట్కు విద్యుత్, నీటి సరఫరా, డ్రైనేజీ లాంటి సౌకర్యాలు అన్నీ ఉన్నాయని, కనుక అది నివాసయోగ్యమేనని ఈ ఆక్యుపెన్సీ సర్టిఫికెట్ (ఓసీ) కొనుగోలుదారుడికి హామీనిస్తుంది.
హెచ్‌ఓఏ :
ఒక అపార్ట్మెంట్లో అనేక ఫ్లాట్స్ ఉంటాయి. కనుక వీటిని సక్రమంగా మెయింటైన్ చేయడానికి, అందరి అవసరాలు తీర్చడానికి, కమ్యూనిటీ నియమాలను, నిబంధనలను సక్రమంగా నిర్వహించడానికి ఒక హోమ్‌ ఓనర్స్‌ అసోసియేషన్ అవసరం అవుతుంది. కనుక ఇంటి యజమానులు సదరు అసోసియేషన్‌కు ప్రతి నెలా క్రమం తప్పకుండా నిర్ణీత మొత్తాన్ని చెల్లించాల్సి ఉంటుంది.
బిల్డింగ్ బైలాస్‌ :
పట్టణాభివృద్ధి మంత్రిత్వశాఖ ఆధ్వర్యంలోని టౌన్‌ అండ్‌ కంట్రీ ప్లానింగ్‌ ఆర్గనైజేషన్‌ కొన్ని నియమాలు, నిబంధనలను రూపొందిస్తుంది. ఈ నియమాలకు అనుగుణంగానే భవనం రూపకల్పన, ఎత్తు, నిర్మాణం, భద్రత అంశాలు ఉండాలి. కనుక మీరు కొనాలని అనుకుంటున్న ఫ్లాట్ ఆ నిబంధనలకు అనుగుణంగా ఉందా, లేదా అనేది చెక్ చేసుకోవాలి.
రెరా :
భారత పార్లమెంట్ 2016లో 'రియల్ ఎస్టేట్ రెగ్యులేటరీ అథారిటీ' (RERA) చట్టాన్ని ఆమోదించింది. స్థిరాస్తి రంగంలో పారదర్శకతను, జవాబుదారీతనాన్ని ప్రోత్సహిస్తూ, కొనుగోలుదారుల ప్రయోజనాలను పరిరక్షించడమే లక్ష్యంగా ఈ చట్టాన్ని తీసుకురావడం జరిగింది. రెరా చట్టం ప్రకారం, డెవలపర్లు తమ ప్రాజెక్టులను RERAలో కచ్చితంగా నమోదు చేసుకోవాలి. ప్రాజెక్ట్ ప్లాన్స్, లేఅవుట్స్, ప్రాజెక్ట్ పూర్తి చేసే తేదీ వివరాలను ముందుగానే కొనుగోలుదారులకు తెలియజేయాలి. అంతేకాదు డెవలపర్లు నిర్దిష్ట ప్రమాణాలు, మార్గదర్శకాలు పాటించాలి. ఒక వేళ డెవలపర్లు నిబంధనలు అతిక్రమిస్తే, వారికి రెరా జరిమానాలు కూడా విధిస్తుంది. మీరు కనుక అపార్ట్మెంట్/ ఫ్లాట్లను కొనుగోలు చేయాలని అనుకుంటే, కచ్చితంగా రెరా వెబ్సైట్లో నిర్మాణంలో ఉన్న ఆస్తి వివరాలను ముందుగానే తనిఖీ చేసుకోవాలి. ఒకవేళ మీకు దీనిపై సరైన అవగాహన లేకుంటే, నిపుణుల సలహాలు తీసుకోవడం మంచిది.
నోట్‌ : ఈ ఆర్టికల్‌లో చెప్పిన అంశాలు కేవలం మీ అవగాహన కోసం మాత్రమే. కీలక ఆర్థిక నిర్ణయాలు తీసుకునే ముందు కచ్చితంగా మీ వ్యక్తిగత ఫైనాన్సియల్‌, రియల్ ఎస్టేట్ నిపుణులను సంప్రదించడం మంచిది.
COMMENTS