NATIONAL HIGHWAY HELPLINE

 NATIONAL HIGHWAY HELPLINE

నేషనల్​ హైవేపై యాక్సిడెంట్​, ఇంధనం అయిపోయినా డోంట్​ వర్రీ! - ఈ టోల్​ఫ్రీ నంబర్​కు కాల్​ చేస్తే చాలు 

జాతీయ రహదారిపై ప్రయాణించినప్పుడు మీ వాహనం ఆగిపోయిందా? - ఏదైనా ప్రమాదం జరిగిందా? - పెట్రోల్​ అయిపోయిందా? - ఈ కింది ఇచ్చే టోల్​ ఫ్రీ నంబర్​కు కాల్​ చేస్తే సరిపోతుంది.

National Highway Helpline : మీరు జాతీయ రహదారిపై దూర ప్రాంతాలకు ప్రయాణం చేస్తున్నారు. అక్కడ మీ వెహికల్​కి ఏదైనా ప్రమాదం జరిగినా, పెట్రోల్​, డీజిల్​ అయిపోయినా, అకస్మాత్తుగా హైవేపై వాహనం నిలిచిపోయినా, టైర్​ పంక్చర్​ అయినా వెంటనే చాలా మంది ప్రయాణికులు ఆందోళనకు గురవుతారు. ఏంటీ ఎవరీలేని ప్రాంతంలో ఇలా జరిగింది.

ఇప్పుడు ఎవరికీ దీని గురించి చెప్పాలి? పోలీసులకు ఫోన్​ చేస్తే ఈ ప్రాంతానికి చేరుకోవడానికి సమయం పడుతుందే అని ఆలోచిస్తూ ఉంటారు. కానీ మీరు ఆందోళన చెందకుండా ఈ 1033 టోల్​ ఫ్రీ నంబర్​కు ఫోన్​ చేస్తే తక్షణమే సాయం అందించడానికి మీ దగ్గరకు వస్తారు. ఇక ఎంచక్కా మీ ప్రయాణాన్ని సాఫీగా సాగించవచ్చు.

టోల్​ ఫ్రీ నంబరు 1033కి కాల్​ చేస్తే :

1. రోడ్డు ప్రమాదం జరిగితే ఘటనాస్థలానికి అంబులెన్స్​ పంపించి క్షతగాత్రులను సమీపంలోని ఆసుపత్రికి తరలిస్తారు.
2. మార్గమధ్యలో వాహనంలో ఇంధనం అయిపోతే పెట్రోలింగ్​ వాహన సిబ్బంది పంపించి ఐదు లీటర్ల పెట్రోల్​ లేదా డీజిల్​ను తెచ్చి ఇస్తారు. అయితే ఇక్కడ ఇంధన ధరను వాహనదారుడే చెల్లించాల్సి ఉంటుందనే విషయం మరిచిపోకూడదు.
3. వాహనం టైరు పంక్చర్​ అయితే పెట్రోలింగ్​ సిబ్బంది వచ్చి టైరు బిగించడానికి సాయం చేస్తారు.

సేవలు పూర్తిగా ఉచితం : 

టోల్​ఫ్రీ నంబరు 1033కి కాల్​ చేస్తే దేశంలోని ఏ జాతీయ రహదారిపై ప్రయాణించిన ఈ సేవలన్నీ ఉచితంగానే అందుతాయి. వాహనదారుడు ఫోన్​ చేసిన 20-25 నిమిషాల్లోపే ఘటనా స్థలానికి పెట్రోలింగ్​, రెస్క్యూ సిబ్బంది చేరుకుంటారు. ఈ టోల్​ ఫ్రీ నంబరును దిల్లీలోని ఎన్​హెచ్​ఏఐ నుంచి పర్యవేస్తిస్తోంది. నేషనల్​ హైవేపై ఏదైనా జరిగితే ఫోన్​ కాల్​ వచ్చిన వెంటనే హైవే నంబరు, లొకేషన్​ వారు అడుగుతారు. వారికి కాల్​ చేయగానే ముందుగా పెట్రోలింగ్​ సిబ్బందికి కాల్​ చేసి సమాచారం అందిస్తారు. అక్కడ వారు స్పందించకపోతే ప్రాజెక్టు మేనేజర్​కి, అతడు కూడా స్పందించకపోతే ప్రాజెక్టు డైరెక్టర్​కు ఫోన్​ చేస్తూనే ఉంటారు.

సమస్య తీరిన తర్వాత వారికి కాల్​ చేసి సమాచారం సేకరణ :

ఇలా పెట్రోలింగ్​ సిబ్బంది లేదా అక్కడికి వెళ్లిన ప్రాజెక్టు అధికారులు సమస్య పరిష్కారం అయిన తర్వాత కాల్​ సెంటర్​కు ఫోన్​ చేసి తెలుపుతారు. మరల 1033 నంబర్​ నుంచి వాహనదారుడికి ఫోన్​ చేసి సమస్య పరిష్కారం అయిందా లేదా ఎవరైనా డబ్బులు అడిగారా? మీరు ఇచ్చారా అని ఆరీ తీస్తారు.

ఈ ఉచిత సేవలపై వాహనదారులకు అవగాహన కలిగేలా ప్రతి జాతీయ రహదారిపై ప్రతి ఐదు కిలోమీటర్లకు ఒక బోర్డును ఎన్​హెచ్​ఏఐ ఏర్పాటు చేసింది. తెలుగు, ఇంగ్లీష్​లో ఏర్పాటు చేసిన 1033 బోర్డులు డివైడర్​ మధ్యలో రోడ్డు పక్కనే ఉంటాయి. దీనిపై వాహనదారుల్లో అవగాహన కల్పించాల్సిన బాధ్యత కేంద్ర, రాష్ట్ర ప్రభుత్వాలపై ఉంది. రోడ్డు ప్రమాదాలను నివారించడానికి కూడా ఇది దోహదం చేస్తుంది.