Auction Property 2023

 Auction Property: Buying a house at a bank auction? Be aware of these risks!

Auction Property: బ్యాంకు వేలంలో ఇల్లు కొంటున్నారా? ఈ రిస్క్‌లు ఉంటాయి చూసుకోండి!

Auction Property: తక్కువ బడ్జెట్‌తో సొంతింటి కలను నెలవేర్చుకోవాలని చాలా మంది భావిస్తుంటారు. అందుకు అనుగుణంగానే ప్రాపర్టీలను వెతుకుతుంటారు. అలాంటి వారు తగు జాగ్రత్తలు తీసుకుని బ్యాంకు వేలంలో పాల్గొనడం ద్వారా ఇంటి యజమాని అయ్యే అవకాశం ఉంటుంది. అయితే, ఇక్కడ కొన్ని రిస్క్‌లు ఉంటాయి. వాటిని ఓసారి మనం తెలుసుకుందాం.

Auction Property: సొంతింటి కలను నెరవేర్చుకునేందుకు ప్రస్తుత రోజుల్లో చాలా మంది బ్యాంకుల్లో రుణాలు తీసుకుంటున్నారు. లోన్ ద్వారా ఇల్లు కొనుగోలు చేస్తున్నారు. అయితే, అందులో కొంత మంది ఏదైనా కారణం వల్ల బ్యాంక్ ఈఎంఐలు తరుచుగా చెల్లించలేకపోవచ్చు. అటువంటి సందర్భంలో ఆ ఇంటి లోన్ డిఫాల్ట్ అవుతుంది. మొదట్లో బ్యాంకులు రికవరీ నోటీసులు పంపుతాయి. ఈ ఆస్తులను సెక్యురిటైజేషన్ అండ్ రీకన్‌స్ట్రక్షన్ ఆఫ్ ఫైనాన్షియల్ అసెట్స్ అండ్ ఎన్‌ఫోర్స్‌మెంట్ ఆఫ్ సెక్యూరిటీ ఇంట్రెస్ట్ యాక్ట్ (SARFAESI) 2002 ప్రకారం బ్యాంకులు వేలం వేస్తాయి. వేలంగా కొనుగోలు చేసిన వారి నుంచి బకాయిలు వసూలు చేసుకుంటాయి.

బ్యాంకుల వేలంలో ఇళ్లు, కమెర్షియల్ ప్రాపర్టీలు ఉంటాయి. వేలంలో పాల్గొనడానికి ఎక్కువ మందే ఆసక్తి చూపుతుంటారు. అయితే, ఇలాంటి వేలం ద్వారా లభించే ప్రాపర్టీని కొనుగోలు చేసేటప్పుడు లాభాలతో పాటు ఎదురయ్యే ఇబ్బందులను కూడా గమనించాల్సి ఉంటుంది. అందుకే కొనుగోలుదారులు తగిన జాగ్రత్తలు తీసుకోవాలి. బ్యాంక్ వెబ్‌సైట్ ఎప్పటికప్పుడు చెక్ చేస్తూ ఉండాలి. BankAuctions.in, eAuctionsIndia.com మొదలైన అనేక ఆన్‌లైన్ ప్లాట్‌ఫామ్స్ దేశంలోని బ్యాంకు ఆస్తి వేలం సంబంధించిన సమాచారాన్ని అందిస్తాయి. ప్రాపర్టీ ప్రాంతం, రిజర్వ్ ధర, వేలం తేదీ వంటి వాటికి సంబంధించి పూర్తి వివరాలు అందిస్తాయి. బ్యాంకులు వార్తా పత్రికల్లోనూ ప్రకటనలు ఇస్తుంటాయి.

ఎదురయ్యే సమస్యలు ఇవే..

• వేలంలో ప్రాపర్టీ కొనుగోలు చేసేటప్పుడు మొత్తం ఆస్తి విలువలో 10-15 శాతం వరకు ప్రీబిడ్డింగ్ డిపాజిట్‌ చేయాలి. బిడ్ గెలిచి, మిగిలిన మొత్తాన్ని కచ్చితంగా నిర్దేశించిన గడువులోగా చెల్లించాలి.
• ఒక వేళ నిర్దేశించిన సమయంలోగా చెల్లిచలేకపోతే వేలంలో పాల్గొన్నవారు ప్రీ బిడ్డింగ్ మొత్తాన్ని కోల్పోవాల్సి వస్తుంది.
• అందుకే బిడ్ మొత్తాన్ని సిద్ధంగా పెట్టుకోవాలి, గడువులోగా చెల్లించాలి.
• ఆస్తికి సంబంధించి బ్యాంకుకు కూడా తెలియని వివాదాలు ఉండొచ్చు.
• బిడ్డింగ్ తర్వాత మీరు ఇబ్బందుల్లో పడినట్లయితే బ్యాంకు దానికి బాధ్యత వహించదు.
• మరోవైపు.. డిఫాల్ట్‌దారుడు బ్యాంకు ఈఎంఐలతో పాటు మరిన్ని బకాయిలను కూడా కలిగి ఉండొచ్చు. ఉదాహరణకు ఆస్తి పన్నులు, యుటిలిటీ బిల్లులు, కమ్యూనిటీ సొసైటీ ఛార్జీల వంటివి ఉంటాయి. వాటిని ముందుగానే తెలుసుకోవాలి.
• మీరు బిడ్ వేస్ ఆస్తికి సంబంధించిన చట్టపరమైన స్థితిని తనిఖీ చేయాలి. మార్కెట్ విలువను అంచనా వేయాలి.
• ఎలాంటి వివదాలు లేవని నిర్ధారించుకోవడానికి ఆస్తి యాజమాన్యం, టైటిల్ పత్రాలను తనిఖీ చేయాలి.
• ఆస్తి నివాసయోగ్యంగా ఉందా లేదా స్వయంగా వెళ్లి చూడాలి.
• అధిక మరమ్మతులతో నిర్మాణాత్మక సమస్యలున్న ఆస్తిని వేలంలో కొనుగోలు చేయకపోవడమే మంచిది.