IRIS 2023

iris: Now face recognition, iris scans for bank transactions..

iris: ఇకపై బ్యాంకు లావాదేవీలకూ ఫేస్‌రికగ్నిషన్, ఐరిస్ స్కాన్‌లు..

ఆర్థిక లావాదేవీల్లో మోసాల కట్టడికి, పన్ను ఎగవేతలను సమర్థవంతంగా గుర్తించేందుకు ఫేస్ రికగ్నిషన్, ఐరిస్ స్కాన్‌ని బ్యాంకులు ఉపయోగించడానికి కేంద్రం అనుమతించనున్నట్లు ఓ ప్రముఖ వార్తా సంస్థ తెలిపింది. వ్యక్తిగత లావాదేవీలు వార్షిక పరిమితిని మించిన సమయంలోనూ.. ధృవీకరణ కోసం బ్యాంకులు ఈ విధానాన్ని వినియోగించనున్నట్లు పేర్కొంది.

డిపాజిట్‌, విత్‌డ్రాల ట్రాకింగ్:

ఇప్పటికే కొన్ని జాతీయ, ప్రైవేట్ బ్యాంకులు ఈ విధానాన్ని ఉపయోగించడానికి ప్రయత్నిస్తున్నాయి. ఇది తప్పనిసరి కానప్పటికీ పాన్ కార్డ్‌ను బ్యాంకు ఖాతాతో జోడించని వినియోగదారులను ఈ పద్ధతిలో అనుసంధానం చేయనున్నారు. ఆధార్‌ కార్డుతో బ్యాంకు ఖాతాలు ఇప్పటికే అనుసంధానమైనందున.. ఎక్కువ డిపాజిట్లు, విత్‌డ్రాలు చేసే వారిని తేలికగా గుర్తించే అవకాశం ఫేస్‌ రికగ్నిషన్, ఐరిస్‌ స్కాన్‌ ద్వారా లభిస్తుంది.

త్వరలో కొత్తం చట్టం:

గోప్యత, సైబర్ భద్రత, ఫేస్‌ రికగ్నిషన్‌పై ఇప్పటి వరకు ప్రత్యేక చట్టం లేనందున పలు ఇబ్బందులు తలెత్తవచ్చని న్యాయ నిపుణులు అభిప్రాయపడుతున్నారు. తదనుగుణంగా ఈ ఏడాది ప్రారంభంలోనే కొత్త చట్టం తెచ్చేందుకు ప్రయత్నాలు చేస్తున్నట్లు ప్రభుత్వ వర్గాలు తెలిపాయి.

ధృవీకరణ తప్పనిసరి...

కొన్ని సందర్భాల్లో వేలిముద్రల ద్వారా ధృవీకరణ విఫలమవుతున్నందున.. ఆ స్థానంలో ఫేస్‌ రికగ్నిషన్, ఐరిస్‌ స్కాన్‌లు వినియోగించేందుకు చూడాలని ఇప్పటికే భారత విశిష్ట గుర్తింపు ప్రాధికార సంస్థ (UIDAI) ఆర్థిక శాఖకు లేఖ రాసింది. దీనిపై చర్యలు తీసుకోవాలని ఆ శాఖ బ్యాంకులకు సైతం సూచించింది. ఏదేమైనా ఆధార్ ధృవీకరణ, ప్రామాణీకరణలు వినియోగదారుని అనుమతితో మాత్రమే జరుగుతాయని UIDAI ప్రతినిధి తెలిపారు.