Check Fraud: SBI Alert to Customers... Key Announcement on Check Fraud... What does it say?
Cheque Fraud: కస్టమర్లకు ఎస్‌బీఐ అలర్ట్.. చెక్ మోసాలపై కీలక ప్రకటన.. ఏం చెప్పిందంటే?
Cheque Fraud: ప్రస్తుత రోజుల్లో చెక్ మోసాలు పెరిగిపోతున్న క్రమంలో కస్టమర్లకు కీలక సూచనలు చేసింది స్టేట్ బ్యాంక్ ఆఫ్ ఇండియా. చెక్ మోసాలకు చెక్ పెట్టేందుకు ఏం చేయాలో వెల్లడించింది. ఆ వివరాలేంటో ఇప్పుడు మనం తెలుసుకుందాం.
Cheque Fraud: ఆన్‌లైన్ బ్యాంకింగ్ సేవలు విస్తృతంగా అందుబాటులోకి వచ్చినా.. ఇప్పటికీ ట్రాన్సాక్షన్స్ కోసం చెక్స్ ఇస్తున్నవారు చాలా మందే ఉన్నారు. ఇదే అదునుగా తీసుకున్న మోసగాళ్లు.. చెక్కుల మోసాలకు పాల్పడుతున్నారు. దీంతో చెక్ మోసాలకు చెక్ పెట్టేందుకు రిజర్వ్ బ్యాంక్ ఆఫ్ ఇండియా (RBI) రెండేళ్ల క్రితం పాజిటీవ్ పే సిస్టమ్ అందుబాటులోకి తెచ్చింది. చెక్ తీసుకొని డబ్బులు ఇవ్వడం, చెక్ బదిలీ చేయడం, చెక్ క్లియర్ చేయడం లాంటి ట్రాన్సాక్షన్లలో జరిగే మోసాలకు బ్రేక్ వేసేందుకు ఈ పద్ధతి ఎంతగానే ఉపయోగపడుతుందని తెలిపింది. మరోవైపు.. స్టేట్ బ్యాంక్ ఆఫ్ ఇండియా (SBI) కూడా పాజిటీవ్ పే సిస్టమ్‌ను అమలు చేస్తోంది. చెక్ ట్యాంపరింగ్ లాంటి మోసాల నివారణకు ఇది ఉపయోగపడుతుంది.
పాజిటివ్ పే సిస్టమ్ ఎలా పని చేస్తుంది?
పాజిటివ్ పే సిస్టమ్‌లో చెక్‌లోని వివరాలను బ్యాంక్‌కి తిరిగి ధ్రువీకరించాల్సి ఉంటుంది. చెక్‌ను ప్రాసెస్ చేసి చెల్లింపులు జరిపే సమయంలో ఈ వివరాలను బ్యాంకు క్రాస్ చెక్ చేస్తుంది. చెక్ మోసం నుంచి కస్టమర్లను పాజిటివ్ పే సిస్టమ్ కాపాడుతుంది. ఎస్‌బీఐ పాజిటివ్ పే సిస్టమ్‌లో రెండు స్టెప్స్ ఉంటాయి. అందులో ఒకటి అకౌంట్ రిజిస్ట్రేషన్, రెండోది లాడ్జ్‌మెంట్ ఆఫ్ చెక్. పాజిటివ్ పే సిస్టమ్ ఉపయోగించుకోవాలని చూసే కస్టమర్లు అందుకు తగిన ఫార్మాట్‌లో దరఖాస్తును బ్యాంకులో సమర్పించి వన్ టైమ్ రిజిస్ట్రేషన్ చేసుకోవాలి. ఇంటర్నెట్ బ్యాంకింగ్, మొబైల్ బ్యాంకింగ్, యోనో యాప్ ద్వారా కూడా రిజిస్ట్రేషన్ చేయొచ్చు. సేవింగ్స్ అకౌంట్ అయితే రూ.5 లక్షలు లేదా అంతకన్నా ఎక్కువ విలువైన చెక్కులకు, కరెంట్ అకౌంట్, క్యాష్ క్రెడిట్, ఓవర్‌డ్రాఫ్ట్ లాంటి ఖాతాలు అయితే రూ.10 లక్షలు లేదా అంతకన్నా ఎక్కువ విలువైన చెక్కులకు పాజిటివ్ పే సిస్టమ్ తప్పనిసరి.
కస్టమర్లు ఎవరికైనా చెక్ ఇస్తే ఆ వివరాలను బ్యాంకుకు వెల్లడించాలి. అందులో అకౌంట్ నంబర్, చెక్ నంబర్, చెక్ తేదీ, చెక్ పైన రాసిన అమౌంట్, బెనిఫీషియరీ పేరు, ఇన్‌స్ట్రుమెంట్ టైప్ లాంటి వివరాలను బ్యాంకుకు తెలియజేయాలి. ఇంటర్నెట్ బ్యాంకింగ్, మొబైల్ బ్యాంకింగ్, ఎస్ఎంఎస్ ద్వారా ఈ వివరాలు బ్యాంకుకు వెల్లడించవచ్చు. మీరు చెక్ ఇచ్చిన వ్యక్తి, ఆ చెక్కును బ్యాంకుకు తీసుకెళ్తే క్లియర్ చేసే ముందు బ్యాంకు ఈ వివరాలన్నీ పోల్చి చూసుకుంటుంది. వివరాలన్నీ సరిగ్గా ఉంటేనే లావాదేవీ పూర్తి చేస్తుంది. ఒకవేళ చెక్ పైన ఉన్న వివరాలు, మీరు వెల్లడించిన వివరాలు సరిపోలనట్టైతే బ్యాంకు ఆ చెక్కును తిరస్కరిస్తుంది. ఇలాంటి సందర్భాల్లో రిటర్న్ ఛార్జీలు వర్తించవు.
చెక్ మోసాలకు ఈ పద్ధతి ద్వారా చెక్ పెట్టవచ్చని స్టేట్ బ్యాంక్ ఆఫ్ ఇండియా సూచిస్తోంది. తమ కస్టమర్లు ఈ పాజిటివ్ పే సిస్టమ్‌ను ఉపయోగించుకుని చెక్ మోసాలకు చెక్ పెట్టాలని కోరుతోంది. ఈ విషయంలో కస్టమర్లు బ్యాంకుతో సహకరించాలని వెల్లడించింది. బ్యాంకుకు చెక్ వివరాలు ముందే తెలియజేయడం ద్వారా ట్రాన్సాక్షన్లలో ఎలాంటి లోపాలు జరగవని చెబుతోంది.
COMMENTS