SIDDIPET MAN AIRPLANE MAKING

 SIDDIPET MAN AIRPLANE MAKING

బ్యాటరీలతో ఎగిరే విమానం! - సిద్దిపేట యువకుని సాహస ప్రయత్నం.

విమానం తయారు చేసిన సిద్దిపేట యువకుడు - కీలక దశకు చేరుకున్న విమాన తయారీ.

Siddipet Man Airplane Making : సిద్దిపేట జిల్లాకు చెందిన ఓ యువకుడు విమానం తయారు చేసి ఎగురవేయడానికి ప్రయత్నిస్తున్నాడు. అతడి ప్రయత్నాలు ఇప్పుడు కీలక దశకు చేరుకున్నాయి. సుమారు 20 అడుగుల ఎత్తుకు ఎగురవేసి, 40 మీ. వరకు ముందుకు సాగేలా చేశాడు. అతడే బాసంగారి లక్ష్మీనరసింహ. ప్రస్తుతం హైదరాబాద్​లో చివర ఏడాది ఇంజినీరింగ్​ చదువుతూ, తన నైపుణ్యానికి పదును పెడుతున్నాడు. గతేడాది మేలో ఒకసారి ట్రయల్​ చేపట్టిన విషయం తెలిసిందే.

ఈ క్రమంలో మరిన్ని మార్పులతో శనివారం జిల్లా కేంద్రంలోని శివారు ప్రాంతంలో మరోమారు ప్రయత్నించాడు. రెక్కలో మార్పులు చేసి, బ్యాటరీ సామర్థ్యాన్ని పెంచి తను అనుకున్న ఫలితాన్ని అందుకున్నాడు. హైదరాబాద్​లో మెకానికల్​ ఇంజినీరింగ్​ చదువుతున్న లక్ష్మీనరసింహ చిన్నప్పటి నుంచే బ్యాటరీ ఆధారంగా నమూనాల రూపకల్పనను ఆసక్తిగా మార్చుకున్నాడు. ఇప్పుడు ఇలా నమూనా విమానాన్ని తయారు చేసి దాన్ని కొంత వరకు ఎగిరించాడు.

విమాన తయారీకి రూ.1.50 లక్షలు : 

ఆ యువకుడు ఏడాదిగా శ్రమిస్తూ విమానం ఎగురవేయడమే లక్ష్యంగా పెట్టుకున్నాడు. సుమారు ఆరున్నర కిలోల బరువున్న నమూనా తయారీకి డెప్రాన్​ షీట్స్​ను వినియోగించారు. ఆరు చిన్నపాటి టైర్లు, నాలుగు చొప్పున ఎలక్ట్రానిక్​ స్పీడ్​ కంట్రోలర్​, సర్వో, ప్రొపెల్లర్స్, మోటార్లు సహా రెండు లిథియం పాలీమర్​ బ్యాటరీలు, పాలీ కవర్​, రేడియం స్టిక్కర్స్​, టేకు కలప వినియోగించారు. రూ.1.50 లక్షలు వెచ్చించి ఈ విమానాన్ని తయారు చేశారు. తాజా ప్రయత్నంలో కొంతదూరం ఎగిరి ముందుకు సాగింది.

నెలాఖరుకు కచ్చితంగా పూర్తిస్థాయిలో ఎగురవేస్తా :

 బ్యాటరీతో నడిచే ఈ విమానం ట్రాన్స్​మీటరు ఆధారంగా ఆపరేట్​ చేయవచ్చు. ఇటీవల పలు ప్లేస్​ నమూనాలు తయారీ చేశానని తెలిపారు. ఇంకా మెరుగుపర్చి ఈ నెల చివర్​లో కచ్చితంగా పూర్తిస్థాయిలో ఎగురవేస్తానని లక్ష్మీనరసింహ ధీమా వ్యక్తం చేశారు.