NATIONAL HIGHWAYS NEW POLICY

NATIONAL HIGHWAYS NEW POLICY

5 ఏళ్ల వరకు భూమి వాడకపోతే తిరిగి ఇచ్చేయాల్సిందే! - త్వరలో కొత్త చట్టం.

జాతీయ ప్రాజెక్టుల భూసేకరణపై త్వరలో కొత్త విధానం - కేంద్రం స్పష్టీకరణ - భూమి సేకరిస్తే ఆ పనులను ఐదేళ్లలో పూర్తి చేయాల్సిందే - లేదంటే భూమిని తిరిగి యజమానికి ఇవ్వాల్సిందే.

National Highways : కేంద్రం ఓ కొత్త విధానాన్ని తీసుకురానుంది. ఈ విధానంలో జాతీయ రహదారుల నిర్మాణానికి భూమి సేకరిస్తే ఆ పనులను ఐదేళ్లలో పూర్తి చేయాల్సిందేనని, లేదంటే యజమానుల నుంచి సేకరించిన భూమిని తిరిగి వారికి ఇవ్వాల్సిందేనని స్పష్టం చేసింది. ఇదే సమయంలో ప్రాజెక్టుల కోసం అప్పగించే స్థలాలకు పరిహారం మంజూరైన మూడు నెలల తర్వాత ఆ భూమిపై యజమానులు హక్కును కోల్పోతారని పేర్కొంది. ఇప్పటికే ఈ విధానానికి సంబంధించిన ముసాయిదా కూడా సిద్ధమైంది. దీన్ని చట్ట రూపంలో తీసుకొచ్చి అమలు చేయాలనే ఆలోచనలో ఉంది.

జాతీయ రహదారులతో పాటు పౌర విమానయానం, రైల్వేలు, రక్షణ, షిప్పింగ్​, బొగ్గు, పర్యావరణం తదితర మంత్రిత్వ శాఖలకు చెందిన విభాగాల ప్రాజెక్టుల కోసం సేకరించిన భూములకూ ఇదే విధానాన్ని అనుసరించనుందని తెలుస్తోంది. భూ సేకరణ చేసిన పలుచోట్ల ఏళ్లుగా రోడ్లు నిర్మించకుండా ఖాళీగా ఉంచుతున్నారు. అభివృద్ధి కోసమని సేకరించిన ఈ భూములు నిరుపయోగంగా మారుతున్నాయి.

మరోవైపు రహదారుల పనులు నత్తనడకన సాగుతున్నాయి. కొన్నిచోట్ల అవసరానికి మించి భూసేకరణ చేపడుతున్నారన్న విమర్శలు సైతం వస్తున్నాయి. ఇలాంటి వాటికి తావు లేకుండా భూసేకరణ ప్రక్రియను మరింత పారదర్శకంగా చేపట్టడానికి కేంద్రం ఈ కొత్త విధానాన్ని తీసుకురానుంది. కేంద్రం తీసుకొచ్చే ఈ కొత్త విధానం ఎంతో ఉపయోగకరంగా ఉండనుంది. ఇందుకు ప్రత్యేక వెబ్​సైట్​ను కూడా రూపొందించనుంది.

బిల్లు ఆమోదం పొందితే రహదారుల నిర్మాణం వేగం :

 ఇందులో భూములు ఇచ్చిన యజమానులు, పరిహారం, విస్తీర్ణం వంటి వివరాలను అందుబాటులో ఉంచనున్నారు. ఈ బిల్లు ఆమోదం పొందితే రహదారుల నిర్మాణం వేగంగా జరగడంతో పాటు భూసేకరణ, పరిహారం విషయంలోనూ స్పష్టమైన వైఖరితో ముందుకు వెళ్లే అవకాశం ఉంటుందని కేంద్ర రోడ్డు, రవాణా, రహదారుల మంత్రిత్వ శాఖ అధికారులు తెలిపారు.