IMPORTANCE OF LIFE SKILLS

IMPORTANCE OF LIFE SKILLS

సెలవుల్లో పిల్లలకు ఈ జీవన నైపుణ్యాలు నేర్పించండి! - అన్నింట్లోనూ వారే ముందుంటారు.

పిల్లలను బావిభారత పౌరులుగా తీర్చిదిద్దాలంటే జీవననైపుణ్యాలు అత్యావశ్యకం - చిన్నారులకు లైఫ్ స్కిల్స్​ నేర్పించడంలో తల్లిదండ్రులదే ముఖ్యపాత్ర

Importance Of Life Skills in Daily Life : బంగారు తల్లీ కొన్ని మంచి నీళ్లు తీసుకురామ్మా అని అన్నం తింటున్న తల్లి మూడుసార్లు పిలిచినప్పటికీ పదో తరగతి పూర్తి చేసిన ఆ కుమార్తె పలకలేదు. దీంతో బాధపడిన తల్లి చివరకు గట్టిగా మందలించడంతో ఏంటమ్మా సెలవుల్లోనైనా నన్ను ప్రశాంతంగా ఉండనీయవు అంటూ చేతిలోని సెల్​ఫోన్​ పక్కన పడేసి వెళ్లిపోయింది. కానీ తల్లికి నీళ్లుమాత్రం ఇవ్వలేదు.

ఇంట్లో మొక్కలకు నీరు పోయమని ఇంటర్మీడియట్​ చదువుతున్న కొడుకును తండ్రి చెప్పారు. ఆ మాట చెవిన పెట్టని కుమారుడిపై తండ్రి గట్టిగా అరవడంతో ఫోన్‌లో లీనమైన అతడు ఇంట్లో ఉంటే ఇలాగే ఏదో ఒక పని చెప్తారంటూ చిరాకుపడుతూ విసుగ్గా ద్విచక్రవాహనంపై ఇంట్లో నుంచి బయటకు వెళ్లిపోయాడు.

సెలవులు జీవన నైపుణ్యాలకు నెలవులు : 

ఇదీ పది, ఇంటర్‌ ఎగ్జామ్స్​ రాసి సెలవుల్లో ఉన్న కొంతమంది పిల్లల వ్యవహార శైలి. పిల్లల ప్రవర్తనతో తల్లిదండ్రుల హృదయం ఆవేదన చెందుతోంది. చదువుతున్నారని ఇన్నాళ్లు వారికి ఏ పని చెప్పకుండా వదిలేస్తే మొదటికే మోసం వచ్చిందని వాపోతున్నారు. పుట్టినప్పటి నుంచీ మాటలు నేర్వడంతోపాటు నడక, ప్రవర్తన తల్లిదండ్రుల నుంచి అలవడినట్లే జీవన నైపుణ్యాలు(లైఫ్​ స్కిల్స్​ను) కూడా అలవాటు చేసుకోవాలి.

ఇంటికి దూరంగా : 

పదో తరగతి, ఇంటర్‌ పూర్తయిందంటే పై చదువుల కోసం ఇంటికి దూరంగా వెళ్లాల్సి వస్తోంది. ఇంట్లో మాదిరిగా అక్కడ కూర్చున్న చోటుకే అన్నీ తెచ్చిపెట్టే అమ్మా నాన్నలు ఉండరు. ఏ అవసరమైనా ఏదైనా వారే చూసుకోవాల్సి ఉంటుంది. కనీస పనులు చేయలేక బద్దకించేటువంటి విద్యార్థులు కొందరు హాస్టళ్లలో ఉండి చదవలేక మారాం చేస్తుంటారు. బలవంతంగా చదివించినట్లయితే అనవసర ఆందోళన, ఒత్తిడి, కుంగుబాటుతో ఇతర సమస్యలు కూడా తలెత్తే అవకాశం ఉంటుంది.

పుస్తకంలో చేర్చినవే :

 ఈ కృత్యాలను 3-5వ క్లాస్​ల విద్యార్థులకు నిర్ధేశించిన పని పాఠ్య పుస్తకాల్లో చేర్చినవే. ఎక్కడా వాటిని బోధించినటువంటి సందర్భం కనిపించదు. ఇళ్లల్లోనూ పాటించినటువంటి దాఖలాలు లేవనే చెప్పాలి. ఐదో తరగతి స్థాయిలో నేర్చుకోవాల్సిన జీవన నైపుణ్యాలు(లైఫ్​ స్కిల్స్​) డిగ్రీ వచ్చినప్పటికీ అలవడటం లేదు.

ఇవి అలవడుతాయి

లైఫ్​ స్కిల్స్​తో బాధ్యత, సాయపడే గుణం, ఆత్మవిశ్వాసం, సంఘటిత శక్తి విలువ, విచక్షణా జ్ఞానం(కామన్​ సెన్స్​) వంటివి అలవడతాయి.

సహజసిద్ధంగా, అనుకరణలో నేర్చుకోవాల్సిన స్కిల్స్​

కిచెన్​ రూం : కూరగాయలు శుభ్రపరచడం, కట్​ చేయడం, వండటం, వంటింటి గట్టు తుడవడం, పాత్రలను శుభ్రపర్చడం, భోజనం వడ్డించడం లాంటివి.

నిద్రించే గది : నిద్ర మేల్కోగానే బెడ్‌షీట్లు మడతపెట్టడం, బెడ్‌ సర్దడంతో పాటు అల్మారాలో దుస్తులు ఓ క్రమపద్ధతిలో అమర్చడం, లైట్లు, ఫ్యాన్లను తుడవడం లాంటి పనులు.

హాలు : టీవీ, ఇతర అలంకరణ సామగ్రిని క్లీన్​గా తుడవడం, బుక్స్​ను ఓ క్రమపద్ధతిలో పెట్టడం, సోఫా కవర్లు, కుర్చీలను సర్దడం లాంటి పనులు.

బాత్‌రూమ్‌ : టూత్‌ బ్రష్‌లు, సబ్బులు, పేస్ట్​ లాంటివి సరైన స్థలంలో పెట్టడం, బాత్‌రూమ్‌లు, శౌచాలయం కడగటం.

పరిసరాల శుభ్రంగా ఉంచడం : బూజు దులపడం, మొక్కలకు నీరు పోయడం, దోమలు ఇతర కీటకాలు ఆశ్రయం పొందకుండా చెత్త, మురుగు నీటిని తొలగించడం.

మార్కెట్ : ఇంటికి కావాల్సినటువంటి సరకులు, కూరగాయలను తీసుకురావడం, ధరలు, నాణ్యత విషయంలో తీసుకోవాల్సినటువంటి జాగ్రత్తలు.

సంస్కారం : ఇంటికి వచ్చినటువంటి వారిని ఆదరించడం, వారిని పలకరించడం లాంటి పనులు.