Do you know the 4 hour rule? How to send money with UPI by mistake?

 Do you know the 4 hour rule? How to send money with UPI by mistake?

4 గంటల రూల్ తెలుసా? పొరపాటున UPIతో డబ్బు పంపితే ఎలా ఉపయోగపడుతుంది?

UPI: యూనిఫైడ్ పేమెంట్స్ ఇంటర్‌ఫేస్ (యూపీఐ) అనేది ఢిల్లీ నుంచి గల్లీ వరకు అందరికీ తెలుసు. చిన్న చిన్న దుకాణాల, టీ స్టాళ్ల నుంచి పెద్ద పెద్ద వ్యాపార సంస్థల్లోనూ యూపీఐ ద్వారా చెల్లింపులు చేస్తున్నారు. ప్రస్తుతం డిజిటల్ పేమెంట్లు భారతీయుల జీవితాల్లో ఒక భాగమయ్యాయి. నెలకు 17 ట్రిలియన్లకు పైగా యూపీఐ లావాదేవీలు జరుగుతున్నట్లు నేషనల్ పేమెంట్స్ కార్పొరేషన్ ఆఫ్ ఇండియా (NPCI) గణాంకాలు చెబుతున్నాయి. యూపీఐ ట్రాన్సాక్షన్లను మరింత ప్రోత్సహించేందుకు రిజర్వ్ బ్యాంక్ ఆఫ్ ఇండియా ఈ ఏడాది తొలి రోజు నుంచే కొత్త నిబంధనలు తీసుకొచ్చింది. జనవరి 1, 2024 నుంచి ఇవి అమలులోకి వచ్చాయి. అందులో 5 రకాల రూల్స్ ఉన్నాయి.

ప్రస్తుత రోజుల్లో డిజిటల్ పేమెంట్లు ఏ స్థాయిలో పెరుగుతున్నాయో అదే స్థాయిలో ఆన్‌లైన్ మోసాలూ పెరుగుతున్నాయి. మోసగాళ్లు యూపీఐ ద్వారా వివిధ రకాలుగా మోసాలు చేస్తున్నారు. వీటిని అరికట్టేందుకు ఆర్‌బీఐ, ఎన్‌పీసీఐ చర్యలు తీసుకుంటోంది. యూపీఐ పేమెంట్లలో ఎదురవుతున్న సవాళ్లను దృష్టిలో ఉంచుకుని మరో నిబంధన ప్రవేశపట్టింది ఆర్‌బీఐ. అదేంటంటే కొత్త యూజర్ల మధ్య మొదటి సారి నగదు బదిలీ సమయంలో రూ.2 వేల కన్నా ఎక్కువ పంపేందుకు నాలుగు గంటల సమయం వేచి ఉండాల్సి ఉంటుంది. అంటే కొత్త వారికి రూ.2 వేలకు మించి పంపినప్పుడు వారి ఖాతాల్లోకి డబ్బులు చేరేందుకు 4 గంటలు సమయం పడుతుంది.

కొన్ని సార్లు పొరపాటున తెలియని వ్యక్తుల యూపీఐ ఐడీలు, ఫోన్ నంబర్లకు పేమెంట్లు చేసే అవకాశం ఉంది. ఇలాంటి సందర్బంలో ఈ కొత్త నిబంధన ఉపయోగపడుతుందని నేషనల్ పేమెంట్స్ కార్పొరేషన్ ఆఫ్ ఇండియా పేర్కొంటోంది. ఒక వేళ పొరపాటున గనుక వేరే అకౌంట్ కి నగదు బదిలీ జరిగినప్పుడు.. ఈ 4 గంటల సమయం లోగా వాటిని తిరిగి పొందేందుకు అవకాశం ఉంటుందని పేర్కొంది. ఆన్‌లైన్ మోసాలను కట్టడి చేసేందుకు ఇది ఉపయోగపడుతుందని ఎన్‌పీసీఐ చెప్తోంది.

పొరపాటున వేరే వ్యక్తి ఖాతాకు యూపీఐ పేమెంట్ చేశామని గుర్తించిన వెంటనే యూపీఐ యాప్ కస్టమర్ కేర్ కి ఫోన్ చేసి తమ లావాదేవీ గురించి ఫిర్యాదు చేయవచ్చు. అలాగే తమ బ్యాంకు ఖాతా ఉన్న బ్యాంకు కస్టమర్ కేర్ కి ఫోన్ చేసి లావాదేవీని పూర్తి చేయవద్దని తమ సమస్యను వివరించాలి. ఫిర్యాదు నమోదు చేయాలి. పొరపాటున పేమెంట్ జరిగిందని, ఆ డబ్బులు తిరిగి తమకు జమ చేయాలని కోరాలి. ఇంతకు ముందు అయితే అవతలి వ్యక్తి ఖాతా నుంచి డబ్బులు తీయకపోయి ఉంటే తిరిగి డబ్బులు వచ్చేందుకు వీలుపడేది. కానీ, 4 గంటల సమయం పాటు మన ఖాతా నుంచి డబ్బులు వారి ఖాతాలోకి వెళ్లవు. దీంతో మన బ్యాంక్ ఆయా ట్రాన్సాక్షన్లను నిలిపివేసేందుకు తగిన సమయం ఉంటుంది. అయితే, పొరపాటు జరిగిన 4 గంటల్లోపు స్పందిస్తేనే ఈ రూల్ ఉపయోగపడనుంది.