Udyogini Scheme: Rs. 3 lakh loan..2024

 Udyogini Scheme: Rs. 3 lakh loan..

Udyogini Scheme: వడ్డీ లేకుండానే ఈ మహిళలకు రూ. 3 లక్షల లోన్.. అప్లై ఎలా? ఫుల్ డీటెయిల్స్ ఇవే..

Udyogini Scheme Eligibility: ఈ రోజుల్లో మహిళలు ఎందులో తక్కువ కాదని నిరూపిస్తున్నారు. ఈ క్రమంలోనే వ్యాపారాలు ప్రారంభించే మహిళల సంఖ్యా పెరిగిపోయింది. అయితే ఇందుకు పెట్టుబడి కోసం ఇబ్బందులు పడుతుంటారు. వీరి కోసమే కేంద్ర ప్రభుత్వం ఉద్యోగిని పథకం తీసుకొచ్చింది. రూ. 3 లక్షలను ఎలాంటి వడ్డీ లేకుండా అందిస్తోంది. ఈ వివరాల్ని ఇప్పుడు చూద్దాం.

Schemes for Women: ఖర్చులు పెరిగిపోతున్న ఈ రోజుల్లో చాలా మంది ఇతర ఆదాయ వనరులపై ఆధారపడుతున్నారు. ఇదే క్రమంలో బిజినెస్‌వైపు ఆలోచనలు మళ్లుతుంటాయి. చిన్న వ్యాపారులు చేసేందుకు నిధుల్లేక ఇబ్బంది పడే మహిళల కోసం.. కేంద్ర ప్రభుత్వం వడ్డీ లేని రుణాలు అందించేందుకే ఒక స్కీం ప్రవేశపెట్టింది. అదే ఉద్యోగిని పథకం. ఈ స్కీం ద్వారా మహిళలకు రూ. 3 లక్షల వరకు లోన్ వస్తుంది. ప్రభుత్వం సూచించిన 88 రకాల వ్యాపారాల్లో ఏదైనా ఒకటి ఎంచుకొని ఆర్థికంగా స్థిరపడేందుకు అవకాశం ఉంటుంది. అంగవైకల్యం, వితంతువులకు మాత్రం రుణ పరిమితి లేదు. అర్హతలు, పెట్టే వ్యాపారాన్ని బట్టి వీలైనంత ఎక్కువ లోన్ పొందేందుకు అవకాశం కూడా ఉంటుంది. మహిళలు తమ కాళ్లపై తాము నిలదొక్కుకోవడం సహా వ్యాపారవేత్తలుగా ఎదిగేందుకు ప్రవేశపెట్టిన పథకమే ఉద్యోగిని. కర్ణాటక ప్రభుత్వం తొలుత ఈ స్కీం ప్రవేశపెట్టినప్పటికీ.. తర్వాత కేంద్రం దీనిని ఉమెన్ డెవలప్‌మెంట్ కార్పొరేషన్ పర్యవేక్షణలో దేశమంతటా తీసుకొచ్చింది.

వారికే ప్రాధాన్యం..

ప్రధానంగా గ్రామీణ ప్రాంత మహిళల ఆర్థిక స్వావలంబనకే అధిక ప్రాధాన్యం ఇస్తారు. వెనుకబడిన ప్రాంతాల్లోని మహిళలను వ్యవస్థాపకులుగా మారేందుకు ప్రేరేపిస్తుంది. పేదలు, నిరక్షరాస్య నేపథ్యాల నుంచి వచ్చిన మహిళలు ఈ స్కీం ద్వారా మద్దతు పొందుతారు. ఈ పథకం ద్వారా వారి వ్యాపారాల్లో మహిళలకు సాయపడే నైపుణ్య శిక్షణ కూడా అందిస్తుంది. ఇప్పటివరకు 48 వేల మందికిపైగా మహిళలు లబ్ధి పొంది వ్యాపారాల్లో రాణిస్తున్నట్లు గణాంకాల ద్వారా తెలిసింది.

వీరికి వడ్డీ రహిత లోన్.. వారికి మాత్రం..

ఈ ఉద్యోగిని స్కీం కింద అంగ వైకల్యం ఉన్నవారు, దళిత మహిళలు, వితంతువులకు పూర్తిగా వడ్డీ లేకుండానే రుణం అందిస్తారు. మిగతా వర్గాలకు చెందిన మహిళలకు మాత్రం 10 నుంచి 12 శాతం వడ్డీ మీద లోన్ ఇస్తారు. ఇక బ్యాంకులను బట్టి ఈ వడ్డీ రేట్లలో మార్పులు ఉంటాయి. ఇంకా కుటుంబ వార్షిక ఆదాయాన్ని బట్టి 30 శాతం వరకు సబ్సిడీ కూడా ఇస్తారు.

ఎవరు అర్హులు?

18 నుంచి 55 సంవత్సరాల వయసు ఉన్న మహిళలు అంతా ఉద్యోగిని పథకానికి అర్హులే. దరఖాస్తుదారు కుటుంబ సంవత్సర ఆదాయం తప్పనిసరిగా రూ.1.50 లక్షలకు మించొద్దు. దరఖాస్తుదారుకు అవసరమైన లోన్ మొత్తం కూడా రూ. 3 లక్షలకు మించకూడదు. రుణంపై ఎలాంటి సెక్యూరిటీ అవసరం లేదు. వైకల్యం ఉన్నవారు, వితంతువులు ఎలాంటి వయో పరిమితి, కుటుంబ ఆదాయం పరిమితి అవసరం లేదు. మిగతా వారు మాత్రం సిబిల్ స్కోరు బాగా ఉండేలా చూసుకోవాలి.

కావాల్సిన డాక్యుమెంట్లు ఇవే.. 

దరఖాస్తు ఫారంతో పాటు రెండు పాస్‌పోర్ట్ సైజ్ ఫొటోలు జత చేయాలి. అప్లై చేస్తున్న మహిళ ఆధార్ కార్డు, బర్త్ సర్టిఫికెట్ ఉండాలి. దారిద్ర్యరేఖకు దిగువన ఉన్న వారు మాత్రం రేషన్ కార్డు కాపీ జతపర్చాలి. ఆదాయ ధ్రువీకరణ పత్రం, నివాస ధ్రువీకరణ పత్రం, కుల ధ్రువీకరణ పత్రం, బ్యాంక్ అకౌంట్ పాస్ బుక్ కూడా ఉండాలి.

ఎలా దరఖాస్తు చేసుకోవాలి?

ఈ స్కీం కోసం అవసరమైన అన్ని డాక్యుమెంట్లతో దగ్గర్లోని బ్యాంకుకు వెళ్లి.. దరఖాస్తు ఫారం తీసుకోవాలి. అవసరమైన/అడిగిన వివరాలు ఫిల్ చేసి.. అప్లికేషన్ పూర్తిగా పూరించాలి. ఫారంలో పేర్కొన్న డాక్యుమెంట్ల ఫొటోకాపీలను అటాచ్ చేయాలి. అనంతరం ఫిల్ చేసిన ఫారంను బ్యాంకుకు సమర్పించాలి. దరఖాస్తు చేసిన తర్వాత.. మీ లోన్ ఆమోదం కోసం క్రమం తప్పకుండా బ్యాంకును సందర్శించడం మరవొద్దు.