Bharat: Do you know how the name Bharat came? What is the hidden story behind the name Bharat..?
Bharat : భారత్ అనే పేరు ఎలా వచ్చిందో తెలుసా..? Bharat పేరు వెనుక దాగిన ఉన్న కథ ఏమిటంటే..?
India that is Bharat : ప్రస్తుతం చర్చంతా దేశం పేరు చుట్టూ తిరుగుతోంది. ఇటీవల G20 విందు ఆహ్వానంలో 'ప్రెసిడెంట్ ఆఫ్ ఇండియా’కి బదులుగా 'ప్రెసిడెంట్ ఆఫ్ భారత్' అని సంబోధించడంతో ఈ చర్చ మొదలైంది.
How did India get the name Bharat : ప్రస్తుతం దేశవ్యాప్తంగా మన దేశం పేరుపై చర్చ నడుస్తోంది. జీ20 సదస్సు (G20 Summit 2023) సందర్భంగా ప్రపంచ దేశాధినేతలకు భారత రాష్ట్రపతి ఇచ్చే విందు కోసం ముద్రించిన ఆహ్వాన పత్రికపై వివాదం రాజుకున్న విషయం తెలిసిందే. రాష్ట్రపతి పంపిన ఆహ్వాన పత్రికలో ఎప్పుడూ ఉపయోగించే ''ప్రెసిడెంట్ ఆఫ్ ఇండియా'' అనే పదానికి బదులుగా ''ప్రెసిడెంట్ ఆఫ్ భారత్'' అని రాయడంతో ఈ వివాదం తలెత్తింది. 'ఇండియా' అనే పదాన్ని దేశం పేరుగా ఉపయోగించడం మానేసి.. దాని స్థానంలో ఇప్పుడు 'భారత్' అని మాత్రమే పిలవాలనే ఉద్దేశంతో కేంద్రం ఈ చర్యకు పాల్పడినట్లుగా విపక్షాలు ఆరోపించాయి. దీంతో వివాదం మరింత ఉధృతమైన విషయం తెలిసిందే. ఈ నేపథ్యంలో.. భారత్ అనే పేరు ఎలా వచ్చిందనే విషయాన్ని తెలుసుకుందాం..
ప్రాచీన కాలంలో భారతభూమికి రకరకాల పేర్లున్నాయి. ఉదాహరణకు జంబూద్వీపం, భరతఖండం, హిమవర్షం, అజనాభవర్ష్, భారతవర్ష్, ఆర్యవర్ష్, హిందూ, హిందుస్థాన్, ఇండియా అనే పేర్లున్నాయి. కానీ వీటిలో ఎక్కువగా వాడుకలో ఉన్నది.. జనాదరణ పొందినది మాత్రం భారత్ అనే పదమే. భారతదేశ వైవిధ్యభరితమైన సంస్కృతిలాగే కాలానుగుణంగా రకరకాల పేర్లు కూడా వచ్చాయి. దేశానికి వచ్చిన ఆ పేర్లు ఒక్కోసారి భౌగోళికంగా, మరోసారి జాతి స్ఫూర్తితో, ఇంకోసారి ఆచారాల, వ్యవహారాల వల్ల వచ్చాయి.
హిందూ, హిందుస్థాన్, ఇండియా లాంటి పేర్లు భౌగోళికంగా వచ్చాయి. ఈ పేర్లు రావడానికి మూలం సింధూ నది అని ప్రముఖంగా వినిపిస్తోంది. కానీ సింధు అనేది ఒక నిర్దిష్ట ప్రాంతానికి సంబంధించినది మాత్రమే కాదు. సింధు అంటే నది, సముద్రం అని రెండు అర్థాలు ఉన్నాయి. ఆ విధంగా చూస్తే దేశంలో నైరుతి ప్రాంతాన్ని ఒకప్పుడు సప్తసింధు లేదా పంజాబ్ అనేవారు. అంటే అక్కడున్న ఒక విశాల సారవంతమైన ప్రాంతం, అక్కడ ప్రవహించే ఏడు లేదా ఐదు ప్రముఖ ప్రవాహాల వల్ల దానిని గుర్తించారనే వాదన ఉంది. అలాగే.. భారత్ అనే పేరు వెనక ‘సప్త సైంధవ’ క్షేత్రాల్లో ‘పనపి అగ్నిహోత్ర’ సంస్కృతి (అగ్ని ఆహుతి చేయడం) గుర్తింపు కూడా ఉంది.
దుష్యంతుడి కొడుకు భరత్ పేరు కారణంగా 'భారత్' అనే పేరు..!
పురాణ యుగంలో భరత్ పేరుతో ఎందరో వ్యక్తులు ఉండేవారు. దుష్యంతుడి కొడుకుతోపాటు దశరథ పుత్రుడు భరతుడు కూడా ప్రముఖుడే. ఆయన రాముడి పాదుకలతోనే పాలించాడు. నాట్యశాస్త్రంలో భరతముని కూడా వీరిలో ఒకరు. ఒక రాజర్షి భరత్ ప్రస్తావన కూడా ఉంది. ఆయన పేరుతో ప్రసిద్ధి చెందిన జాతీయాలు కూడా ఉన్నాయి. మగధ రాజ్యంలో ఇంద్రద్యుమ్నుడి సభలో కూడా ఒక భరత రుషి ఉండేవారు. పద్మపురాణంలో క్రూరుడైన భరత్ అనే బ్రాహ్మణుడి ప్రస్తావన కూడా ఉంది. కానీ..
దుష్యంతుడి కొడుకు భరత్ పేరు కారణంగా 'భారత్' అనే పేరు వచ్చిందని ‘ఐతరేయ బ్రాహ్మణం’లో కూడా ఉంది. ఈ గ్రంథంలోని వివరాల ప్రకారం.. భరతుడు అనే చక్రవర్తి నలువైపులా ఉన్న భూభాగాన్ని సొంతం చేసుకుని విశాల సామ్రాజ్యం స్థాపించాడు. అశ్వమేథ యజ్ఞం చేశాడు. అందుకే ఆయన రాజ్యానికి ‘భారతవర్ష్’ అనే పేరు వచ్చింది. అలాగే.. మత్స్యపురాణంలో మనువును ప్రజలకు జన్మనిచ్చిన వరుడు అని, వారి పోషణ చూసుకోవడం వల్ల ‘భరత్’ అని చెప్పారు. ఆయన పాలించిన భూభాగాన్ని ‘భారతవర్ష్’ అన్నారు.
మహాభారతానికి ముందే భారత్ :
చరిత్రకారుల వివరాల ప్రకారం క్రీ.పూర్వం సుమారు 2500 ఏళ్ల క్రితం కౌరవులు-పాండవుల మధ్య మహాభారత సంగ్రామం జరిగి ఉండచ్చు. అలా అనడానికి కారణం.. ఆ యుద్ధంలో భారత భౌగోళిక సరిహద్దులో వచ్చే దాదాపు అన్ని సామ్రాజ్యాలూ పాల్గొన్నాయి. అందుకే దానిని మహాభారత్ అన్నారు. దశరాజ్య యుద్ధాలు ఆ యుద్ధం కంటే 2500 సంవత్సరాల క్రితం జరిగిందని చెబుతారు. అంటే ఇప్పటికి సుమారు 7500 ఏళ్ల క్రితం అప్పటి యుద్ధం జరిగింది.
ఆ యుద్ధంలో తృత్సు జాతి ప్రజలు పది రాజ్యాల సమాజాలపై అఖండ విజయం సాధించారు. తృత్సు జనులను భరతుల సమాజం అనేవారు. ఈ యుద్ధానికి ముందు ఈ ప్రాంతం ఎన్నో పేర్లతో ప్రసిద్ధి చెందింది. ఆ విజయం తర్వాత అప్పటి ఆర్యావర్తనంలో భరతజనుల ప్రతిష్ట అంతకంతకూ పెరిగింది. అప్పటి జిల్లాల మహాసమాఖ్య పేరు భారత్ అయ్యింది. అంటే భరతుల రాజ్యం అని అర్థం. ఇలా భారత్ అనే పేరు వచ్చిందని కూడా అంటారు.
ఆంగ్లంలో ఇండియా.. ?
ఇండియా అనే ఆంగ్ల పదం.. లాటిన్కు, ఇంగ్లీషుపై దాని ప్రభావాన్ని సూచిస్తుంది. ఈ పేరు ఓల్డ్ ఇంగ్లీష్లో ప్రసిద్ధి చెందింది. కింగ్ ఆల్ఫ్రెడ్ యొక్క ఒరోసియస్ ట్రాన్స్లేషన్లో కనిపిస్తుంది. అయితే.. ఫ్రెంచ్ భాష ప్రభావంతో.. ‘ఇండియా’ ‘యందే’ లేదా ‘ఇండే. పదాలతో రీప్లేస్ అయింది. ఎర్లీ మోడరన్ ఇంగ్లీష్ చివరి దశ వరకు (15వ శతాబ్దం చివరి సగం నుంచి 1650 AD వరకు) 'ఇండియా' పేరు మళ్లీ తెరపైకి వచ్చింది. ఈ పునరుజ్జీవనానికి లాటిన్, స్పానిష్ లేదా పోర్చుగీస్ ప్రభావం కారణమని చెప్పవచ్చు. ఇవి పదాన్ని తిరిగి ప్రవేశపెట్టాయి. ఫలితంగా కింగ్ జేమ్స్ బైబిల్ మొదటి ఎడిషన్, ప్రఖ్యాత నాటక రచయిత విలియం షేక్స్స్పియర్ రచనల్లో ‘ఇండియా’ కనిపించింది. అప్పటి నుంచి 'ఇండియా' అనే పేరు ఇంగ్లీష్ భాషలో వాడుకలో ఉంది.
COMMENTS