IT Refund 2023

 IT Refund: Haven't received your Income Tax Refund yet? Do this immediately..!

IT Refund: మీకు ఇన్‌కమ్ ట్యాక్స్ రిఫండ్ ఇంకా రాలేదా? వెంటనే ఇలా చేయండి..!

IT Refund: ఐటీఆర్ ఫైల్ చేసి నెల రోజులు గడిచిపోయినా ఇంకా మీకు రిఫండ్ రాలేదా? మీ ఐటీ రిటర్న్స్ సంబంధించిన రిఫండ్ రీఇష్యూ కోసం ఏం చేయాలో తెలుసుకోండి. ఇన్‌కమ్ ట్యాక్స్ విభాగానికి ఎలా ఫిర్యాదు చేయాలి, స్టేటస్ ఎలా తెలుసుకోవాలి అనే విషయాలు ఇప్పుడు తెలుసుకుందాం.

IT Refund: పన్ను పరిధిలోకి వచ్చే వేతన జీవులు ఇన్‌కమ్‌ ట్యాక్స్‌ రిటర్న్‌ కచ్చితంగా ఫైల్‌ చేయాలి. 2022- 23 ఆర్థిక ఏడాదికి సంబంధించిన ఐటీఆర్ ఫైలింగ్ గడువు జులై 31తో ముగిసిపోయింది. ఐటీఆర్‌లో ఇన్‌కమ్‌, డిడక్షన్‌లు, పే చెయ్యాల్సిన ట్యాక్స్‌ వివరాలు ఉంటాయి. వీటి ఆధారంగా పన్ను చెల్లింపుదారులు ప్రభుత్వానికి చెల్లించాల్సిన ట్యాక్స్‌ని లెక్కిస్తారు. చెల్లించాల్సిన దానికంటే ఎక్కువ ట్యాక్స్‌ చెల్లించినట్లు గుర్తిస్తే, ఆ మొత్తాన్ని ప్రభుత్వం రిఫండ్‌ చేస్తుంది. ఆదాయ పన్ను శాఖ తెలిపిన వివరాల ప్రకారం జులై 31 అర్ధరాత్రి సమయానికి 6.77 కోట్ల రిటర్న్స్ ఫైల్ చేసింది. ఇందులో 3.44 కోట్ల ఐటీఆర్ అప్లికేషన్ల రిఫండ్ ప్రక్రియ పూర్తయినట్లు తెలిపింది. ఇంకా చాలా మంది రిఫండ్ కోసం ఎదురు చూస్తున్నారు.

సాధారణంగా ఐటీ రిఫండ్ ప్రాసెస్ పూర్తి కావడానికి కనీసం వారం నుంచి నాలుగు నెలలు సమయం పడుతుంది. అయితే, కొన్ని సార్లు ఇన్‌కమ్ ట్యాక్స్ రిఫండ్ ఆలస్యం అవుతుంటుంది. దీనికి కారణాలేంటి? రిఫండ్ కాకపోతే ఏం చేయాలి? అనే విషయాలను తెలుసుకుందాం. 

రీఫండ్ ఆలస్యం కావడానికి ప్రధానంగా ఐదు కారణాలు ఉంటాయి.

• బ్యాంక్ వివరాలు తప్పుగా ఉంటే రిఫండ్ ప్రక్రియ ఆలస్యం అవుతుంది.
• అదనపు డాక్యుమెంట్లు ఇవ్వాల్సి వచ్చినప్పుడు సమయానికి రిఫండ్ రాదు.
• ఐటీఆర్‌లో తప్పుడు సమాచారం పొందుపర్చడం
• కంపెనీ సమర్పించే టీడీఎస్ లేదా టీసీఎస్‌‌కి ఉద్యోగి పొందుపర్చే టీడీఎస్ లేదా టీసీఎస్‌కి తేడా ఉండటం
• అండర్ ప్రాసెస్‌డ్ రిఫండ్

ఇన్‌కం ట్యాక్స్ రిటర్న్స్ ఫైల్ చేశాక అప్లికేషన్ స్టేటస్ చెక్ చేస్తూ ఉండాలి. ఇ- ఫైలింగ్ వెబ్‌సైట్ అయిన incometaxindiaefiling.gov.in సంప్రదించవచ్చు. 

నేషనల్ సెక్యూరిటీస్ డిపాజిటరీ లిమిటెడ్ ఇ-గవర్నెన్స్ వెబ్‌సైట్ tin.nsdl.com వెబ్‌సైట్‌ని ఆశ్రయించి స్టేటస్ చెక్ చేసుకోవచ్చు.

• ఇ-ఫైలింగ్ వెబ్‌సైట్‌లో స్టేటస్ చెక్ చేయడానికి లాగిన్ కావాలి.
• యూజర్ ఐడీ, పాస్‌వర్డ్‌లను ఎంటర్ చేయాలి.
• అనంతరం, ఇ-ఫైల్ ఆప్షన్‌పై క్లిక్ చేయాలి.
• ఇక్కడ, ఇన్‌కం ట్యాక్స్ రిటర్న్ సెలెక్ట్ చేసుకుని View Filed Returnపై క్లిక్ చేయాలి.
• View Details ఆప్షన్‌ని సెలెక్ట్ చేసుకుంటే ఇటీవల ఫైల్ చేసిన ఐటీఆర్ స్టేటస్ కనిపిస్తుంది.

ఐటీఆర్ ఫైల్ చేశాక బ్యాంక్‌ అకౌంట్‌లో రిఫండ్ జమ కాకపోతే ఎందుకు కాలేదని తెలుసుకోవాలి. ముందుగా ఇ-మెయిల్ చెక్ చేసుకోవాలి. ఇన్‌కమ్ ట్యాక్స్ డిపార్ట్‌‌మెంట్ నుంచి ఏదైనా ఇ-మెయిల్ వచ్చిందేమోనని చెక్ చేసుకోవాలి. ఒక్కోసారి అదనపు డాక్యుమెంట్లు కావాలని ఇమెయిల్ వస్తుంటుంది. ఒకవేళ ఈ ఇ-మెయిల్ వస్తే సరైన సమాధానం ఇవ్వాలి. అడిగిన డాక్యుమెంట్లను సమర్పించాలి.

రిఫండ్ గడువు ముగిసిందని ఐటీఆర్ స్టేటస్‌లో చూపిస్తే రిఫండ్ రీఇష్యూ కోసం రిక్వెస్ట్ పెట్టుకోవాలి. మరోవైపు, Returned అని స్టేటస్‌లో ఉంటే మళ్ళీ ఇ-ఫైలింగ్ పోర్టల్ లేదా అసెసింగ్ ఆఫీసర్ వద్ద రిఫండ్ రీఇష్యూ కోసం అప్లై చేసుకోవాలి. ఐటీఆర్ ఫైలింగ్ అనంతరం 30 రోజుల్లో రిఫండ్ క్రెడిట్ కాకపోతే ఒకసారి స్టేటస్ చెక్ చేసుకోవాలని ఆదాయ పన్ను అధికారులు సూచిస్తున్నారు. ఇ-ఫైలింగ్ పోర్టల్‌లో ఏ కారణం తెలపలేకపోతే ఫిర్యాదు చేయొచ్చు. Incometax.gov.in వెబ్‌సైట్‌ని ఆశ్రయించవచ్చు. ఇదే కాకుండా, ఇన్ కమ్ ట్యాక్స్ టోల్ ఫ్రీ నంబర్ 1800-103-4455కి కాల్ చేయవచ్చు.