Student Housing: What an idea, Guru.. Student housing with all the facilities are coming in Hyderabad.. There will be no more pain!
Student Housing: ఏం ఐడియా గురూ.. హైదరాబాద్లో సకల సౌకర్యాలతో విద్యార్థి గృహాలు వచ్చేస్తున్నాయ్.. ఇక ఆ బాధలేం ఉండవు!
Housing Complexes: రియల్ ఎస్టేట్లో ఇటీవలి కాలంలో మరో కొత్త విభాగం వేగంగా విస్తరిస్తోంది. స్టూడెంట్ హౌసింగ్ (Student Housing) ప్రాచుర్యం పొందుతోంది. విద్యార్థుల కోసం ఇప్పుడు సకల సౌకర్యాలు ఉండే విధంగా గృహ సముదాయాలను నిర్మిస్తున్నాయి రియల్ ఎస్టేట్ సంస్థలు.
Real Estate: రియల్ ఎస్టేట్ కొత్త పుంతలు తొక్కుతోంది. ఇప్పటివరకు రెసిడెన్షియల్ హౌసింగ్, ఆఫీస్ స్పేస్కు డిమాండ్ ఉండగా.. ఇప్పుడు మరో విభాగం కూడా వేగంగా విస్తరిస్తుండటం గమనార్హం. అదే స్టూడెంట్ హౌసింగ్. అవును.. విద్యార్థుల కోసం ఇప్పుడు పలు సంస్థలు సౌకర్యాలన్నీ ఉండే విధంగా హౌసింగ్ కాంప్లెక్స్లను రూపొందిస్తున్నాయి. దిల్లీ, బెంగళూరు సహా ఇంకొన్ని నగరాల్లో ఇప్పటికే ఈ స్టూడెంట్ హౌసింగ్ నిర్వహిస్తున్న సర్వీస్ ప్రొవైడర్స్.. హైదరాబాద్ సహా దేశంలోని ఇతర కొన్ని నగరాలకు విస్తరిస్తున్నారు. నాణ్యమైన వసతికి భరోసా కల్పిస్తున్నారు.
విద్యార్థుల అవసరాలకు తగ్గట్లే.. వారి హాస్టల్స్ రూపురేఖలు పూర్తిగా మారుతున్నాయన్నమాట. ఇప్పటివరకు ఒక గది, అపార్ట్మెంట్లలో ఫ్లాట్ అద్దెకు తీసుకొని ముగ్గురు, నలుగురు స్టూడెంట్స్ కలిసి ఉంటున్నారు. అయితే చాలా సార్లు వీరికి నగరాల్లో గది దొరకడం కష్టమే. ఇప్పుడు అదే పరిస్థితి ఉంది. కొందరు పేయింగ్ గెస్ట్లుగా (పీజీ) ఉంటున్నారు. ఇంకొంతమందేమో కాలేజ్ దగ్గర్లో హాస్టల్స్లో ఉంటున్నారు. అయితే వీటిలో సౌకర్యాలు మనం కోరుకున్న విధంగా ఉండవు. అంతంతమాత్రంగానే ఉంటాయి. అపరిశుభ్రంగా ఉంటాయని విద్యార్థులు తరచూ ఫిర్యాదు కూడా చేస్తుంటారు. అక్కడి పరిసరాలు కూడా చదువుకునేందుకు అంత అనుకూలంగా ఉండవు. ఇప్పుడు ఎవరి అవసరాలకు తగ్గట్లుగా వారు విద్యార్థుల గృహాలను ఎంచుకునే విధంగా ఉంటున్నాయి. పలు నగరాల్లో ఈ సేవలు అందుబాటులోకి రాగా.. అక్కడ ఆదరణ కూడా బానే ఉందని చెబుతున్నారు నిర్వాహకులు.
హైదరాబాద్, గురుగ్రామ్, బెంగళూరు, పుణె, వైజాగ్ల్లో స్టూడెంట్ హౌసింగ్ నిర్వహిస్తున్న హౌసర్ కో లివింగ్ సంస్థ దిల్లీ, కోటాకు విస్తరిస్తుంది. ఈ సంవత్సరం ఆఖరి కల్లా ఆయా నగరాల్లో విద్యార్థులకు వసతి కల్పించనుంది.
ఇక యూవర్ స్పేస్ సంస్థ ఇప్పటికే దిల్లీ, ముంబయి, పుణెల్లో 5500 పడకలు కలిగి ఉంది. బెంగళూరు, జైపుర్, హైదరాబాద్, చెన్నై, కోటా, కోల్కతాకు కూడా విస్తరించబోతోంది. 2024 కల్లా 20 వేల పడకలకు విస్తరిస్తోంది
అద్దెలు ఎక్కువే..
హాస్టళ్లతో చూస్తే ఈ విద్యార్థి గృహాల రెంట్స్ కాస్త ఎక్కువే ఉంటాయి. అత్యంత శుభ్రంగా, విద్యార్థులకు కావాల్సిన వసతులన్నీ ఉండేలా ఈ గదులు ఉంటాయి. గదిలో ఇద్దరు మాత్రమే విద్యార్థులు ఉంటారు. వద్దనుకుంటే మాత్రం ఒక్కరు కూడా ఉండొచ్చు. ఇలాంటి నివాసాల్లో నెలకు అద్దె ఒక్క విద్యార్థికి 2021లో రూ. 9 వేల నుంచి రూ.14,500 వరకు ఉండగా.. 2022 నాటికి రూ.11,200- 18,500 వద్ద ఉంది. బెంగళూరు, దిల్లీ, ముంబయి వంటి చోట్ల ధరలు ఇలా ఉండగా.. ఏటా 10 నుంచి 15 శాతం వరకు పెరుగుతున్నాయి.
COMMENTS