PF Withdrawal Rules 2023

 PF Withdrawal: Need money urgently? Do you know how much PF money comes for what reason?

PF Withdraw: అత్యవసరంగా డబ్బులు కావాలా? పీఎఫ్ నగదు ఏ కారణానికి ఎంత వస్తుందో తెలుసా మరి?

PF Withdrawal Rules: ఈ రోజుల్లో ఉద్యోగం చేసే దాదాపు అందరికీ పీఎఫ్ అకౌంట్ ఉండే ఉంటుంది. ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) మన పీఎఫ్ ఖాతా చూసుకుంటుంది. అయితే ఇందులో మనం డబ్బులు విత్‌డ్రా చేసుకోవచ్చు. అయితే ఒక్కో కారణానికి కొంత మొత్తంలో డబ్బులు వస్తాయి. దాని గురించి ఇప్పుడు తెలుసుకుందాం.

PF Balance: ఉద్యోగం చేసే ప్రతి ఒక్కరికీ దాదాపు పీఎఫ్ అకౌంట్ ఉంటుంది. ఇందులో మనం పనిచేసే కంపెనీ మన వేతనం నుంచి 12 శాతం వరకు కట్ చేస్తుంటుంది. సంస్థ కూడా అంతే మొత్తంలో జమ చేయాల్సి ఉంటుంది. దీనిపై కేంద్రం - ఈపీఎఫ్‌ఓ వడ్డీ యాడ్ చేస్తుంటుంది. అయితే మన అవసరాల కోసం.. మనం డిపాజిట్ చేసిన పీఎఫ్ డబ్బుల్ని విత్‌డ్రా చేసుకునే అవకాశం ఉంటుంది. ఈపీఎఫ్‌ఓ ఈ అవకాశం కల్పిస్తోంది. పెళ్లి, ఆస్పత్రి ఖర్చుల కోసం, ఇల్లు కట్టుకోవడం కోసం, చదువు కోసం.. ఇలా పలు కారణాలతో విత్‌డ్రా చేసుకోవచ్చు. చాలా మంది తమకు అత్యవసర సమయాల్లో పీఎఫ్ డబ్బులు తీసుకోవడం చూస్తూనే ఉంటాం. అయితే ఏ కారణానికి ఎంత తీసుకోవచ్చనే దానిపై చాలా మందికి అవగాహన ఉండకపోవచ్చు.

చాలా వరకు క్లెయిమ్ చేస్తుంటారు. ఎంత వస్తుందనేది ఆ తర్వాత డబ్బులు అకౌంట్లో క్రెడిట్ అయినప్పుడు మాత్రమే మనకు తెలుస్తుంటుంది. అయితే మనకు ఏ కారణంపై ఎంత వరకు డబ్బులు వస్తాయో ఇప్పుడు తెలుసుకుందాం.

ఈపీఎఫ్ ఖాతాదారులు.. పెళ్లి కోసం 50 శాతం వరకు పీఎఫ్ డబ్బుల్ని విత్‌డ్రా చేసుకునేందుకు అవకాశం ఉంటుంది. ఈ విత్‌డ్రా కోసం మాత్రం ఏడేళ్ల సర్వీస్ పూర్తయి ఉండాలి. ఈపీఎఫ్ సభ్యుడు లేదా వారి కొడుకు/కూతురు/సోదరుడు లేదా సోదరి పెళ్లి కోసం డబ్బులు తీసుకోవచ్చు. ఇక ఉన్నత చదువుల కోసం కూడా 50 శాతం వరకు డబ్బులు వస్తాయి.

కొత్త ఇల్లు కట్టుకోవడం లేదా కొనుగోలు చేసేందుకు పీఎఫ్ డబ్బులు తీసుకోవచ్చు. ఇక్కడ ఐదేళ్ల సభ్యత్వం అవసరం. ఇంటి స్థలం కొనుగోలు చేసినందుకు.. నెలవారీ జీతం కంటే 24 రెట్లు, ఇల్లు కొనుగోలు చేసేందుకు మాత్రం 36 రెట్ల వరకు డ్రా చేయొచ్చు. ఇంటి నిర్మాణానికి 36 రెట్లు వస్తుంది. ఇంటి రెనోవేషన్ కోసం మాత్రం నెల జీతం కంటే 12 రెట్లు డ్రా చేయొచ్చు.

ఇక ఆస్పత్రి ఖర్చుల కోసం కూడా పీఎఫ్ డబ్బులు విత్‌డ్రా చేసుకునే సౌలభ్యం ఉంది. ఉద్యోగి నెలవారీ జీతానికి 6 రెట్లకు సరిపడా నగదు తీసుకోవచ్చు.

ఇంకా ఉద్యోగి మరో సంవత్సరంలో రిటైర్ అవుతున్నాడనుకుంటే.. అప్పుడు పీఎఫ్ అకౌంట్ నుంచి 90 శాతం వరకు విత్‌డ్రా చేసుకోవచ్చు. రిటైర్మెంట్‌కు ఏడాది లోపే ఇది వర్తిస్తుందని గుర్తుంచుకోవాలి.