Turmeric Cultivation: How to cultivate turmeric?

 Turmeric Cultivation : పసుపు సాగు ఎలాగంటే?..

Turmeric Cultivation : పసుపు దుంపజాతి మొక్క. భారత దేశంలో హిందువులు శుభకార్యక్రమాలకు పసుపును వినియోగిస్తారు. పచ్చ బంగారంగా పిలువబడే పసుపు పంట సాగును తెలుగు రాష్ట్రాల్లో అధిక విస్తీర్ణంలో సాగు చేస్తూ రైతులు అద్భుత ఫలితాలను సాధిస్తున్నారు. పసుపు పంట సాగుకు తేమతో కూడిన వేడి వాతావరణం కలిగిన నేలలు అనుకూలం. వాతావరణం 25-30డిగ్రీలు ఉష్ణోగ్రత వున్న ప్రాంతాలు ఈపంట సాగుకు అనువుగా వుంటాయి.

పసుపు పంట సాగును మే మూడో వారం నుంచి జూన్‌ రెండో వారం వరకు చేపట్టవచ్చు. పసుపు సాగుకు సేంద్రియ పదార్థం పుష్కలంగా ఉన్న ఇసుక నేలలు , ఒండ్రు మట్టి నేలలు, గరప నేలలు బాగా సౌకర్యవంతంగా ఉంటాయి. ఈపంట సాగుకు మురుగు నీటి పారుదల వసతి తప్పనిసరిగా ఉండాలి. మురుగునీటి పారుదల వసతి లేకుంటే పసుపు దుంప కుళ్ళి మొక్కలు చనిపోయే ప్రమాదం ఉంది. దీని వల్ల రైతులకు నష్టం వాటిల్లుతుంది.

పసుపు పంటను ఎత్తు మడుల పద్ధతి, బోదెల పద్ధతిలో సాగు చేస్తారు.బోదెల పద్ధతిలో 45 నుడి 50 సెంటీమీటర్ల దూరం ఉండేలా తయారుచేసుకోవాలి. బోదెల మీద 25 సెంటీమీటర్ల దూరంలో దుంపలు నాటుకోవాలి. ఎత్తు మడుల పద్ధతిలో మీటరు వెడల్పు, 15 సెంటీమీటర్ల ఎత్తుగల మడులు తయారు చేసుకొని, మడుల మధ్య 30 సెంటీమీటర్లు, దుంపల మధ్య 25 సెంటీమీటర్ల దూరం ఉండేలా నాటుకోవాలి.

కలుపు సమస్య ఎక్కువగా ఉన్న నేలల్లో పసుపు దుంపలు నాటిన మరుసటిరోజే అట్రజిన్ కలుపు మందును ఎకరాకు 600-800 గ్రా. 200 లీటర్ల నీటిలో కలిపి నేల మొత్తం పిచికారి చేసుకోవాలి.దుంపలు నాటిన 40-45 రోజులకు కలుపు నివారణ చర్యలు తీసుకోవాలి. నేల మరియు కలుపు ఉధృతి బట్టి వంట కాలంలో 3 -4 సార్లు పలు దఫాలుగా కలుపు నివారణకు అంతరకృషి చేపట్టాలి. పంట వేసుకునే ముందు పశువుల ఎరువు ఎకరానికి 10-15 టన్నుల వేసుకొని దుక్కి చేసుకోవాలి. పశువుల ఎరువు వెయ్యలేకపోతే చివరి దుక్కిలో ఎకరానికి 200 కిలోల వేపపిండి మరియు కానుగ పిండి లేదా 200 కిలోల సూపర్ ఫాస్ఫేట్ మరియు ఆముదం పిండి కలుపుకొని వేసుకోవాలి. చివరి దుక్కిలో జింక్ సాల్ఫేట్ వేసుకోవాలి. పసుపు నాటుకున్న 35-40 రోజుల మధ్య ఎకరానికి 50 కిలోల యూరియ మరియు 200 కిలోల వేపపిండి రెండు కలుపుకొని వేసుకోవాలి.