Machine Gun Robot Dog : వామ్మో .. రోబో కుక్క .. మెషిన్ గన్తో కాల్చుతోంది
Machine Gun Robot Dog : ఈ సంవత్సరం మనం చూసే భయంకరమైన వీడియోల్లో ఇది ఒకటి అనుకోవచ్చు. అసలే ఇప్పుడు ఉక్రెయిన్ లో రష్యా యుద్ధం చేస్తోంది. ఇలాంటి సమయంలో... రష్యాలో ఓ రోబో కుక్క తన వీపుపై మెషిన్ గన్ ఉంచుకొని కాల్పులు జరుపుతున్న వీడియో సోషల్ మీడియాలో వైరల్ అవుతోంది. ఇది ఎవరి పని? రష్యా ప్రభుత్వమే ఇలా చేయిస్తోందా? ఇకపై యుద్ధాల్లో సైనికుల బదులు.. రోబో కుక్కల్ని వదులుతుందా? అసలేం జరుగుతోందో తెలుసుకుందాం.
Machine Gun Robot Dog : మనం రజనీకాంత్ - శంకర్ కాంబోలో వచ్చిన రోబో సినిమా చూశాం. అందులో చిట్టి రోబోను తయారుచెయ్యడానికి ప్రధాన కారణం యుద్ధాలు జరిగినప్పుడు సైనికుల బదులు రోబోలను వాడాలన్న ఆలోచన. సైనికులైతే ప్రాణాలు కోల్పోయే ప్రమాదం ఉంటుంది. అదే రోబోలైతే వాటికి ప్రాణం ఉండదు కాబట్టి.. అవి యుద్ధాల్లో నాశనం అయినా ప్రాణనష్టం అనే ఆలోచన ఉండదు అన్నది ఆ సిసిమాలోని సైంటిస్ట్ వశీకరణ్ ఉద్దేశం. ఈ విషయం ప్రపంచ దేశాలకూ తెలుసు. కానీ ఏ దేశమూ ఇప్పటివరకూ రోబోలను యుద్ధాల్లో ప్రవేశపెట్టలేదు. ఎందుకంటే... వాటికి స్వతహాగా ఆలోచించే లక్షణం లేకపోవడమే. కానీ ఇప్పుడో రోబో కుక్క స్వయంగా యుద్ధం చేస్తోంది. సరిహద్దుల్లో అటూ ఇటూ తిరుగుతూ... శత్రువుల్ని గురి చూసి కాల్పులు జరుపుతోంది. సైనికులు ఎలాగైతే... వంగి వంగి జాగ్రత్తగా శత్రువుల్ని మట్టుపెడతారో... అదే విధంగా ఆ రోబో కుక్క కూడా వంగి వంగి.. జాగ్రత్తగా కాల్చుతోంది. ఫలితంగా సైన్స్-ఫిక్షన్ థ్రిల్లర్ కాస్తా రియల్ గా కనిపిస్తోంది. భవిష్యత్తులో యుద్ధాలన్నీ రోబోలతోనే జరుగుతాయి అనిపించేలా చేస్తోంది ఆ రోబో డాగ్. ఇప్పుడు అందరూ ఈ వీడియో గురించే మాట్లాడుకునే పరిస్థితి తెచ్చింది. అంతలా అది వైరల్ అవుతోంది.
ట్విట్టర్ లోని sonicmega అకౌంట్లో ఈ వీడియోని జులై 20, 2022న పోస్ట్ చెయ్యగా... ఇప్పటికే దీన్ని 74 లక్షల మంది చూశారు. మరో ట్విట్టర్ అకౌంట్ @PPathole లో కూడా ఈ వీడియోని జులై 21, 2022న పోస్ట్ చెయ్యగా... అందులో కూడా ఇప్పటికే 74 లక్షల మంది చూశారు. ఇలా అత్యంత వేగంగా ఈ వీడియో వైరల్ అయ్యింది. దీన్ని గమనిస్తే... బోస్టన్ డైనమిక్స్ రోబోటిక్స్ కంపెనీ (Boston Dynamics) తయారుచేసిన ఆకారంలో ఉన్న రోబో కుక్కకు వీపు పైన సబ్ మెషిన్ గన్ తగిలించివుంది. పర్వత ప్రాంతంలో ఆ కుక్క అటూ ఇటూ తిరుగుతూ... కాల్పులు జరుపుతోంది.
ఇప్పటివరకూ రోబో డాగ్స్ ని ఇళ్లలో కాపలా కోసం, పార్కుల్లో పర్యవేక్షణ కోసమే వాడుతున్నారు. కానీ ఈ కుక్క రష్యాలో ఇలా కాల్పులు జరుపుతుండటం నెటిజన్లకు ఒకింత ఆందోళన కలిగిస్తోంది. చాలా సైన్స్ ఫిక్షన్ సినిమాల్లో రోబోలు మనుషులకు ఎదురు తిరిగినట్లు కథలు ఉండటంతో... భవిష్యత్తులో నిజంగానే ఇలాంటి రోబోలు ఎదురు తిరిగితే ఏమవుతుందో అనే ఆందోళన నెటిజన్లలో ఉంది. ఈ రోబో కుక్కపై రష్యా జెండా ఉండటం వల్ల ఈ వీడియోని రష్యాలో షూట్ చేసినట్లు భావిస్తున్నారు. ఇది నిజమైనదా, నకిలీదా అనేది తెలియట్లేదు. దీనికి సంబంధించిన ఒరిజినల్ వీడియోని రష్యా లోని టెక్ వ్యాపారవేత్త, హోవర్ బైక్ కంపెనీ స్థాపకుడు అలెగ్జాండర్ అటమానోవ్ (Alexander Atamanov) మార్చిలో పోస్ట్ చేసినట్లు ఓ ట్విట్టర్ యూజర్ తెలిపారు.
COMMENTS